Sur da nus
Las persunas davos il project
Team dil project e susteniders
Il team dil project secumpona d’acturs dalla vischnaunca da Sumvitg, planisaders specialisai, architects dalla cuntrada, planisaders dall’economia da menaschi e l’uniun cun bunamein 800 commembers.
Tuts persequiteschan la medema finamira: La realisaziun dil Lag Salischinas
Svilup regiunal
Regiun Surselva
La corporaziun dil dretg public cumpeglia il territori dil Rein Anteriur naven da Laax entochen tier la tgina dil Rein al Péz Badus cun las vals lateralas Lumnezia, Stussavgia, Medel, Val Sogn Pieder e Val Sumvitg. La Regiun Surselva separticipescha al project tier damondas pertuccont la planisaziun locala, il svilup regiunal, il turissem e la cultura.
Purtadra dil project
La vischnaunca Sumvitg
La vischnaunca Sumvitg agescha sco purtadra dil project Lag Salischinas e sustegn il svilup digl areal a moda proactiva. Il turissem datier alla natira che colligia la populaziun indigena cun ils scazis culturals ei da caracter decisiv per l’entira regiun. Il manteniment e la promoziun da Sumvitg sco liug da viver e habitar ei la motivaziun centrala dalla vischnaunca Sumvitg.
Il gestiunari previu
TCS
Il TCS ei il pli grond purschider da plazzas da campadi en Svizra e posseda campadis en tuttas regiuns. Cun varga 70 onns experientscha el sectur e varga 600‘000 pernottaziuns annualas vala il TCS sco expert fideivel cun gronda experientscha sil sectur dil turissem da loschament.
Gl‘ei reussiu da gudignar cun il TCS in partenari da project fidau che planisescha il menaschi futur dil Lag Salischinas.
Coordinaziun
La cumissiun
La cumissiun Lag Salischinas secumpona da persunas dalla vischnaunca Sumvitg, dall’uniun e responsabels dil project ord ils secturs svilup regiunal, planisaziun dil territori e management da project. La delegaziun ei dapi il november 2021 sin incumbensa dalla vischnaunca responsabla per l’organisaziun dil project e coordinescha il cuntegn.
La cumissiun secumpona ord suandonts commembers:
– Placi Wenzin, president dalla cumissiun
– Patrick Schaniel, president communal vischnaunca Sumvitg
– Luis Beer, commember dalla cumissiun
– Curdin Maissen, commember dalla cumissiun
– Maurus Berther, commemeber dalla cumissiun
– Fabian Collenberg, canzlist communal vischnaunca Sumvitg
Ils specialists digl ambient
Ecowert GmbH
La fatschenta Ecowert vala sco specialist per gl’ambient cun il focus sin ils secturs: aua, tiara, explotaziun da material, formaziun da cuntrada sco era la moda d‘elaborar cumplessiv ed integrativ. La consideraziun integrala possibilitescha en connex cun projects da construcziun ed infrastructura l’elaboraziun professiunala e fundada dils acts da basa.
Agricultura persistenta
Project parzial Igniu
La finamira dil project Igniu ei da contribuir ina cumpart al provediment da victualias localas producidas a moda ecologica risguardond aspects socials. Leutier s’auda d’ina vart la producziun da legums e puma e da l’autra vart gl’experimentar cun metodas da cultivaziun e sorts per aschia cumplementar las victualias dall’agricultura da muntogna. En cooperaziuns cun instituziuns dalla scienzia sa aschia vegnir gudignau novas enconuschientschas pertuccont biodiversitad ed agricultura.
Geomatica, inschignier da construcziun ed ambient
Biro d’inschignier Cavigelli
Dapi la fundaziun gl‘onn 1973 porscha il biro d’inschignier Cavigelli survetschs d’inschignier cumpetents ed innovativs. Entras l’experientscha gronda e multifara sils secturs da geomatica, d’inschignier sco era d‘ambient e planisaziun posseda il biro bia savida dil fatg per l‘execuziun cumpetenta ed efficienta dallas incaricas.
Geologia, hidrogeologia e prighels dalla natira
Sieber Cassina + Handke SA
Dapi 1988 porscha Sieber Cassina + Handke SA cun sedia a Cuera survetschs tier projectaziuns ni execuziuns sils secturs da geologia, fundaments, geologia d’inschignier, geotecnica, hidrogeologia, ambient, schurmetg dallas auas, construcziun da deponias, prighels dalla natira, terren contaminau e deponias veglias.
Sviluppadra da project
Quant SA
Quant SA ei in luvratori d’innovaziun e da projects da Flem ch’ei habla a moda interdisciplinara e cun cumpetenzas metodicas d’elaborar integral e structurau damondas d’interpresas a moda interdisciplinara e cun cumpetenzas metodicas. Cun integrar la savida specifica dalla clientella seresultan ideas creativas, sligiaziuns realisticas e la basa per decider objectivamein. La finamira ei da sustener interprendiders en lur decisiuns per aschia surmuntar las sfidas digl avegnir cun success.