Elements dil project
In liug da recreaziun ella Surselva
Il Lag Salischinas duei esser in territori da recreaziun en Surselva il qual perschuada entras la formaziun naturala, las auas e las cuntradas. La purschida da loschament dil glamping e dil campadi possibilitescha als hosps da guder la regiun e la natira. La formaziun architectonica dil territori s’accordescha perfetgamein cun la cuntrada naturala e scaffescha entras quei ina colligiaziun harmonica denter carstgaun e natira. Ils suandonts elements dueien s‘unir e dar la fascinaziun dil Lag Salischinas.
Auas e cuntrada
Gl‘element aua ha en Surselva, buca sco davos pervia dil Rein, ina muntada speciala. In grond diember da puozs, lags e flums enriheschan la regiun e procuran per ina flora e fauna viva e prospereivla. L’aua dalla fontauna a Val Tenigia ella Val Sumvitg vala schizun sco aua curativa e quei grazia al cuntegn da mineralias. Consequentamein eis ei evident che la tematica aua retscheiva era tier il Lag Salischinas in focus central. La cuntrada da recreaziun formada a moda naturala promova il spazi da viver per flora e fauna.
Cuntrada da lags
La cuntrada da lags che consista da lags cun aua sutterrana e lags principals sin in territori da 7.9 hectaras scaffescha ina convivenza denter diever turistic e la promoziun dalla cuntrada. Gl‘element central digl areal ein ils lags novs da far bogn. La posiziun e formaziun succeda al cuors dil flum vegl. Aschia dat ei ina relaziun consistenta denter ils lags e la riva.
Praus humids
Ils praus humids porschan spazi da viver custeivel per flora e fauna (amfibis, utschals ed animals pigns) e promovan la rihezia dallas spezias e la biodiversitad. Grazia allas spezias flurentas e la zona da canna cunfinonta ein ellas interessantas per observaziuns dalla natira e guidas. Il territori natural daventa aschia tier in territori ruasseivel per observaziuns ed aventuras.
Praus maghers
Ils praus maghers cun la rihezia dallas spezias vegnan cultivai extensiv ed ei cun tochen 100 spezias da flurs per ara in sistem ecologic impurtont. Oravontut per insects rars e periclitai ein las numerusas flurs in paradis e gidan aschia encunter il cumbat dalla muria dils insects.
Loschament e gastronomia
Il coc dil menaschi dil Lag Salischinas ei la purschida da loschament dil glamping e campadi. Circumdada dalla imposanta cuntrada muntagnarda dalla Surselva duei vegnir dau al hosp futur il sentiment dalla veta sursilvana. El duei survegnir in access direct tier la natira e duei saver guder quella cun tut ils senns.
Sco gestiunari potenzial e partenari da project eis ei reussiu da gudignar il TCS.
Campadi e glamping
La purschida da loschament secumpona d’in campadi e d’in glamping che porscha la pusseivladad da pernottaziuns d’aulta qualitad ella natira. La purschida ei concepida per in menaschi sur gl’entir onn e procura per in’aventura da loschament unica amiez la Surselva. Il potenzial carschent sil sectur da campadi ed activitads el liber vegn aschia plidentaus cumpleinamein.
Gastronomia
In liug da ruassar e sesentir bein, in liug da s‘entupar e secommunicar. La gastronomia dil Lag Salischinas empermetta dapli che culinarica. Entras igl inscunter dalla populaziun indigena cun ils hosps dat ei aventuras autenticas che restan ditg en buna memoria. Tier l’elecziun dils products vegn dau peisa sin regiunalitad, stagiunalitad e qualitad. Plinavon vegn tgirau ina amicabla collaboraziun cun poducents locals.
La purschida
Architectura
La formaziun architectonica futura dil Lag Salischinas ei vegnida elegida cun ina concurrenza d’architectura menada atras cun la procedura d’invitaziun. Gudignau ha il biro d’architectura Capaul e Blumenthal cun il project Tras Selvas e Pardialas.
Architectura: il project victur
Il project victur „Tras Selvas e Pardialas“ dil biro d’architectura Capaul e Blumenthal en collaboraziun cun l’architecta da cuntrada Nina von Albertini ed ils specialists d’aua Hunziker, Zarn e partenaris preveda in equiliber denter aua e tiara. Ils baghetgs dueien vegnir eregi tenor usanza indigena. Primarmein vegn duvrau materials da baghegiar naturals che derivan dalla regiun. Materials sco lenn massiv ni tiara (arschella, chis, sablun) dattan la tempra dalla nova architectura e risguardan la historia dalla regiun.
Primar
Per la persistenza ei in agir cun las resursas cun senn da responsabladad impurtont. Perquei vegn primarmein elegiu materials da baghegiar naturals ch’ein disponibels ella regiun. Cun evitar transports liungs, process da producziun che drovan bia energia vegn contribuiu ina cumpart per la reducziun dall’energia grischa. Tier ils elements murals vegn, nua che pusseivel, desistiu sin betun e luvrau cun arschella. Il material per ils mirs – arschella, chis, sablun – vegn gudignaus directamein ord il scavament.
Igniu
Agricultura solidarica cun caracter da pionier
Il project „Igniu“ ei dedicaus all’agricultura solidarica e duei contribuir al provediment da victualias multifar, local e risguardond aspects socials sco era promover la biodiversitad e la fritgeivladad dil terren. Gl’experimentar cun novas sorts da cultivaziun e metodas en accumpignament scientific duei cumplementar la cuntrada muntagnarda. Plinavon duei ei dar pusseivladads da seperfecziunar ed in liug da brat denter las differentas gruppas d’interess.
Sistem da provediment resilient
Cul project duei vegnir realisau pass per pass in sistem da producziun e provediment il qual possibilitescha in ault grad da resilienza ed aschia esser dependents da mo paucs products externs. Il project „Igniu“ formescha ina purschida per ils indigens e hosps che vulan augmentar la savida e s’occupar cun ina lavur che fa senn duront cuort ni liung temps ed aschia era separticipar vid gl‘avegnir dalla regiun. Entras participaziun, cuminonza, transfer da savida vegn creau aventuras che dattan satisfacziun el sectur da persistenza.
Simbiosa denter agricultura e turissem…
Entras coordinar ils process e nezegiar sinergias tier la cumpra / vendita, manteniment, dismessa, loschament eav. dat ei ina simbiosa denter l’agricultura ed il turissem enteifer il perimeter dil Lag Salischinas.
…e denter marcau e tiara
„Igniu“ creescha in liug inspirond per inscunters ils quals promovan l’aventura communabla ed il dialog denter provinza e marcau. Cun questa filosofia presta „Igniu“ ina contribuziun impurtonta per la posiziun e l’identitad dil Lag Salischinas ed enrihescha il portfolio da purschidas e transferescha il sentiment dalla veta sursilvana.
Flora
La vegetaziun dil Lag Salischinas s’orientescha en general all’ogna, allas rivas naturalas ed alla vegetaziun dil pastg. Las plontas ei gl‘element che colligia la cuntrada. Las cuntradas porschan ensemen culla vegetaziun dallas rivas naven dallas palius entochen ils territoris crappus ina gronda diversitad da spazis da viver. Duront la fasa da baghegiar ei la collaboraziun cun specialists d’utschals ed amfibis ed il cumbatter dallas neofitas fetg impurtont.
Persistenza
Il turissem ei dependents sco strusch in‘autra branscha d’ina natira intacta, stabilitad politica, cultura vivida e populaziun accoglienta.
Sco project exemplaric vul il Lag Salischinas surprender ina funcziun da model el sectur da persistenza. Il risguard dallas dimensiuns ecologicas, economicas e socialas ei en quei connex essenzial.
Cun la definiziun dils camps d’acziun, las finamiras e mesiras procura il project Lag Salischinas per ina contribuziun effectiva per contonscher las finamiras tenor „Sustainbale Development Goals“ e dalla strategia per in svilup persistent 2030 dalla Confederaziun.
